Concello da Capela: monumentos

Arquitectura Relixiosa:

Outra construcción da mesma época é a igrexa parroquial de Santiago da Capela , no lugar de Pazo, de planta románica, na que destaca a torre campanario á que se accede dende o exterior mediante unha escaleira de pedra, que torna de caracol no interior da torre.

Do século XIII é a capela de Nosa Señora das Neves, de orixe románica, planta rectangular dunha soa nave e unha torre engadida do século XIX de planta cadrada e campanario de catro arcos, coroado por unha cúpula de media laranxa.

A igrexa parroquial de San Braulio de Caaveiro. A ábside é do século XIII e a fachada do XIX; é de planta rectangular dunha soa nave, de fachada simétrica cun campanario central de dous ocos rematados en pináculos. A igrexa parroquial de Santa María de Cabalar, de estilo barroco do século XIX. De planta rectangular dunha soa nave e fachada simétrica cun campanario central de dous ocos rematados en pináculos con bola.De tipo relixioso son tamén os cruceiros, como os do Pazo, Cabalar e As Neves.

Arquitectura Popular :

A arquitectura popular destaca polas construccións anexas ás vivendas, como os hórreos, as fontes, os pozos, os lavadoiros ... sendo sen dúbida os máis destacados os hórreos, predominando os do tipo "Mahía", caracterizados por descansar en soleiras macizas, case sempre de cantería, onde asentan as cámaras que levan tornarratos corridos de perfil en talude. Os claros divídense con columnas de pedra e péchanse os costais con balaústres de madeira. Cóbrense sempre a dúas augas e con lousa, tan propia nos tellados da comarca, e remóntanse moitas veces con cruces e pináculos.

Mención especial merecen os muíños de auga, moi abundantes en calquera dos ríos que regan A Capela. Algún destes muiños pódese visitar e ver en funcionamento.

Da importancia da auga na forma de vida da poboación da Capela da boa mostra a existencia dunha ferrería hidráulica, o machuco, de gran tamaño, que se atopa no río da Graña, e é unha das poucas construccións deste tipo que existen en Galicia.